Categories
Thoughts

أصدقاء النكسة

Dark Shadow Stairs Stock Photo, Picture And Royalty Free Image. Image 20608328.

في ٢٠١٧ كنت في psychiatry بسبب الاكتئاب الحاد و في الوقت ده اتعرفت على الناس اللي كانوا معايا في ال group therapies و كنا بنخرج مع بعض احيانًا او بنعمل اي activities سوا،

من الناس اللي أثروا فيا ساعتها حد اتعرفت عليه كانت تبلغ من العمر ٤٤ عام، قالتلي متتعشمش ان دول كلهم هيفضلوا موجودين، دول كلهم اسمهم أصدقاء النكسة، علاقات كوّنتها في وقت كنت محتاج حد جنبك وهم كمان محتاجين حد بيمر بتجربة مشابهة ليهم في الوقت الحالي،

لما كله هيبدأ يقف على رجليه تاني محدش هيعرف حد، عشان كل واحد هيحاول يرجع لحياته الطبيعية و انت مش هيكون ليك مكان فيها.

في الأول مأخدتش كلامها بجدية، لحد ما لقيت ان فعلًا لما كل واحد فينا بدأ يرجع لحياته الطبيعية التواصل بدأ يقل بصورة كبيرة، و الناس اللي كنت بتواصل معاها كانت بتحصل بيننا مشاكل وخلافات بصورة دورية و كانت معظم العلاقات دي بتستنزف المشاعر و الوقت.

في اعتقادي برضه ان العلاقات دي بتنتهي بسبب ان كل واحد عايز يحاول ينسى المرحلة دي من حياته، و وجودك بيفكروا بمشاعر كان بيحس بيها سواء اراديًا او لااراديًا.

او جايز ان في وقت تكوين العلاقة كنت بتدور على حد بيمر بنفس تجربتك او تجربة شبيهة ليها، فلما تخطيت الفترة دي من حياتك، مبقاش بينكوا حاجات مشتركة، او الأساس الللي اتبنت عليه العلاقة هيّن و ضعيف، و مع الوقت هيختفي.

وقتها كان اعتراضي على منطق “أصدقاء النكسة” انه بيخالف اللي اتربينا عليه، ان صاحبك اللي يبقى جنبك في الوقت اللي انت محتاجه فيه فده هيثبتله قد ايه انت commited ليه،

و لكن للأسف احيانًأ لما حد يرجع يقف على رجليه، مبيكنش عايز يفتكر المشاعر السلبية اللي مر بيها تاني، بالذات لو انت في الفترة دي بدأت تمر بمشاكل في حياتك اومريت بنكسة و بتحكي فهيحس بأن تأثيرك سلبي على حياته فهيحاول يتجنبك وده مش ندالة من الشخص او عيب منه، ولكن جايز انت مش شايف تأثير كلامك عليه عامل ازاي.

في الأخر حابب اشكر كل أصدقائي اللي عاشوا معايا الفترة دي و فضلوا مكملين، أكيد وجودي كان سلبي للغاية على حياتهم و كل اللي كمل معايا لحد ما عرفت أقف على رجلي تاني مش هنسى اللي عمله معايا.

ملحوظة: العلاقات الانسانية معقدة، و انا مش خبير، انا بحكي تجارب شخصية و تحليلي ليها و اللي بالتأكيد يحتمل الخطأ أو الصواب.

Categories
Thoughts

عن متلازمة المحتال

Bildergebnis für imposter syndrome

ال Imposter Syndrome او متلازمة المحتال، تعريفها حسب Wikipedia هو

متلازمة المحتال (تُعرَف أيضًا بظاهرة المحتال، أو الاحتيالية، أو متلازمة المحتال، أو تجربة المحتال) هي نمط نفسي يشك فيه المرء بإنجازاته ولديه خوف داخلي دائم من أن يعتبره الآخرون «محتالًا».

اعتقد ان من المعروف في مجالنا ان فيه كتير بيعانوا من المتلازمة دي، معظم الوقت هيكون اللي بيعاني منها بها حاسس انه قليل جنب اللي معاه في فريق العمل حتى لو كان معدل انتاجيته عالية (Productive).

بيكون حاسس انه بالصدفة البحتة عرف يوصل للمركز اللي هو فيه

و هيفضل حاسس انه مُعرّض طوال الوقت ان ينكشف امره و يطرد من شغله بعد ذلك

البعض يحاول تجاوز المشكلة دي بانه يـ Show off شغله، و للاسف كتير بيقع في فخ الـ Over Engineering

مشكلة بتكون سهلة و بسيطة، وبيختار حل معقّد عشان يبين انه فاهم مثلا System Design Principles كويس

لو هنبص على تأثيرمتلازمة المحتمال هنلاقي ان:

  • بيبذل مجهود أكبر بكتير من اللي حواليه.
  • مع المجهود الكبير ال output اللي بيطلعه مش بيكون مرغوب فيه بالصورة اللي هو متوقعها، عشان بالتأكيد مش هتطلع Perfect حتى لو حاول.
  • في الغالب هيحصل برضه تأخير في تسليم المهام المطلوبة منه  و ده على المدى الطويل قد يؤثر على حياته المهنية والشخصية.

أعتقد ان حل متلازمة المحتال عمره ما هيكون في ان الشخص يبذل مجهود أكبر من زملائه في الشغل او انه يحاول يبين ذكائه و قدراته.

في أبحاث ربطت بالفعل بين متلازمة المحتال و اضطراب القلق الاجتماعي أو Social Anxiety Disorder

بعض الحلول لتجاوز متلازمة المحتال

  • شارك مشاعرك مع غيرك.
  • قيّم مهاراتك الشخصية و المهنية.
  • فكّر فيما تفكّر.
  • عندما تبدأ بتقييم مهاراتك ستجد العديد من الأفكار السلبية تدور في عقلك، حاول معرفة أسباب أو أصل هذه الأفكار.
  • حاول معرفة لماذا و من أين أتت هذه الفكرة من الأساس.
  • تجنب الوقوع في فخ المقارنة.
  • تجنب المثالية وتقبل الأخطاء.
  • استشير متخصص.